Museo Arqueolóxico do Santuario de Asclepeion de Epidauro

O Museo Arqueolóxico do Asclepeion ou Asklepio de Epidauro é un museo de Grecia situado no sitio arqueolóxico de Epidauro, pertencente á rexión da Argólida. Visiteino en dúas ocasións.

O edificio do museo construíuse entre 1898 e 1900, aínda que non entrou en funcionamento ata 1909. Trátase, por tanto, dun dos museos máis antigos de Grecia. A exposición foi deseñada polo arqueólogo Panagiotis Kavvadias.

O museo contén unha colección de obxectos procedentes principalmente do santuario de Asclepio de Epidauro, que foi escavado entre 1881 e 1928. 

Entre os obxectos expostos figuran antigos instrumentos médicos, lámpadas de aceite sacras, ofrendas votivas, esculturas, relevos, inscricións, elementos arquitectónicos e tamén copias dalgunhas estatuas cuxos orixinais foron levados ao Museo Arqueolóxico Nacional de Atenas.

Entre as esculturas destacadas atópanse unha estatua de Hixía do século IV a. C., e estatuas doutras divindades como Asclepio e  Afrodita, de época romana. 

Son tamén importantes diferentes inscricións. Unha delas é unha inscrición do século IV a. C. na que se asignan os traballos de construción do santuario e os seus correspondentes gastos. 

Entre os elementos arquitectónicos son destacables os  rosetóns dun tholos, así como seccións do templo de Asclepio, do de Artemisa e dos propileos.

Persoalmente considero que este pequeno museo non lle fai xustiza ao conxunto arqueolóxico. Ben merece unha ampliación e unha nova musealización das súas pezas.

Texto: Wikipedia.

Fotos: Iniciarte.