Bauhaus e o deseño

Para ir rematando o curso, un vídeo sobre a Bauhaus

Setglass: páxina recomendada

Hoxe quixera presentarvos Setglass, unha páxina feita en Cataluña, sen referencias á súa webmáster, polo que respetarei o seu silenzo e non a identificarei.

A páxina é pura arte, pura fotografía, puro deseño, pura calidade. Unha caixa sen fondo. Inmensa. Imposoble gozala toda dun tirón. Chea de sorpresas.

Coa súa propia revista on-line e outras seccións.

Fainos adorar as súas viaxes.

Non está actualizada, pero quen dixo que a arte ten data de caducidade?

A disfrutala.

A Fundación Barrié exporá 300 obras do deseñador George Nelson

O arquitecto norteamericano está considerado como un dos personaxes máis influentes no estilo de medidados do século XX.

Algunhas das obras máis emblemáticas e representativas do deseño estadounidense do século XX chegarán á cidade para formar parte dunha exposición dedicada ao arquitecto George Nelson, que servirá para conmemorar o centenario do seu nacemento e que acollerá a Fundación Barrié.

A exposición, que se inaugurará o día 25 de xuño e que poderá visitarse ata o 27 de setembro, mostrará por primeira vez en España as creacións do deseñador, cualificado por algúns críticos de arte como un dos personaxes que mellor encarnan as transformacións xurdidas en Estados Unidos tras a II Guerra Mundial.

Nelson aplicou os parámetros do deseño moderno ao interior das vivendas mediante a creación de cadeiras de brazos, lámpadas, mesas e armarios. As 300 pezas que poderán admirar os visitantes da exposición que organiza a Fundación Barrié servirán para repasar a evolución dun artista que, ademais de exercer como deseñador e arquitecto, alcanzou unha gran notoriedade como xornalista e mestre.

Pezas tan coñecidas internacionalmente como a Coconut Chair -cadeira coco- e o Marshmallow sofa -que recorda nas súas formas ao algodón de azucre- formarán parte dunha exposición que incluirá, ademais das obras, numerosos paneis informativos sobre a biografía do autor e sobre as características do seu novo estilo.

As obras que se mostrarán na exposición estarán agrupadas en cinco áreas, cada unha das cales incluirá os traballos de Nelson nas súas distintas facetas.

Os obxectos decorativos para as vivendas, os anuncios corporativos da fábrica de mobles para a que traballou, as pezas destinadas a mellorar o aspecto dos despachos, os documentos das exposicións organizadas polo autor e os testemuños escritos e audiovisuais sobre a vida do deseñador son os grandes grupos que conformarán a exposición.

Os críticos destacan que o maior atractivo do deseño de Nelson é a súa vixencia na actualidade, pois afirman que, a pesar do paso do tempo, as súas creacións de mediados de século seguen parecendo novas e, en ocasións, controvertidas.

A chegada das obras de George Nelson servirá á Fundación Barrié para proseguir unha liña expositiva dedicada ao deseño contemporáneo. O mesmo recinto no que se mostrarán as obras do creador norteamericano acolleu en anos anteriores algunhas das pezas máis representativas do deseño escandinavo ou do arquitecto Marcel Breuer.

As obras de George Nelson chegarán á cidade procedentes do prestixioso museo alemán de Vitra Design, que se encarga de organizar a exposición.

Texto e foto (Marshmallow sofa) vía La Opinión de A Coruña.

A Fundación Barrié acollerá unha mostra do deseño holandés máis innovador

Máis de 140 pezas de artistas consolidados e novos valores serán expostas a partir de outubro na Coruña.

A Fundación Pedro Barrié da Maza presentará, en colaboración coa Asociación de Deseñadores de Madrid (Dimad), a mostra Deseño holandés: Na rúa como en casa na súa sede da Coruña o próximo 17 de outubro. A exposición, que se articulará nas áreas Descansa, Xoga, Come, Ilumina, Interactúa, Protexe e Traballa, mostrará pezas representativas de 61 relevantes deseñadores holandeses e de novos valores, entre eles Marcel Wanders, Tjep, Richard Hutten, Ineke Hans, Demakersvan, Joris Laarman ou Hella Jongerius.

A mostra incluirá un total de 142 pezas deseñadas para os espazos público e privado co obxectivo de establecer a relación entre a contorna doméstica e o da rúa como un continuo. Entre elas, destacan mobiliario urbano, sofás e vaixelas, nos que o colector e o contido logran unha harmonía perfecta; lámpadas, videoxogos, tobogáns para xogar en casa e na rúa, pezas especialmente creadas para os nenos e ata un paraugas con formas máis adecuadas para a choiva racheada.

Con esta exposición, promovida ademais pola Embaixada dos Países Baixos en España e que permanecerá aberta ao público ata o 25 de xaneiro de 2009, a Fundación Barrié retoma a súa liña expositiva dedicada ao deseño contemporáneo, na que se enmarcou a mostra Deseño escandinavo. Máis aló do mito, no 2006, ou Marcel Breuer. Deseño e arquitectura, no 2005.

Carácter didáctico
Deseño holandés: Na rúa como en casa posúe un marcado carácter didáctico e divulgativo, e programará diversas actividades paralelas, entre elas un taller de catro días, gratuíto, en novembro, destinado a profesionais e estudantes do ámbito do deseño e a arquitectura e centrado na relación entre o deseño e a cidade.

Referente internacional
A exposición presenta o espazo privado e o público como un continuo, como unha secuencia lóxica. Non se percibe unha fronteira clara entre o dentro e o fóra na sociología da vida cotiá dos neerlandeses. De aí o sentido dialéctico da exposición, no que se emparellan intencionadamente obxectos que teñen un uso similar, pero que pertencen aos dous ámbitos da experiencia urbana na vida das persoas.

Texto e foto : Vía La Voz de Galicia.