O deseñador desta escultura-fonte é o barcelonés Jaume Plensa (1955).
Consta dunha dupla estrutura prismática no lado sur-oeste do Millennium Park de Chicago. Foi inaugurada en xullo de 2004, a partir dunha idea plasmada no 2000 e construída desde 2003. Forma parte dun extraordinario conxunto de esculturas situados por todo o downton e das que Iniciarte xa vos falou (Picasso, Moore, Miró, Kaspoor, )
Consta de dúas torres paralelas creadas con bloques de vidro de case 16 metros de altura proxectando permanentemente imaxes de caras de cidadáns de “cidade do vento” seleccionadas entre máis dun milleiro de voluntarios fotografados polo propio deseñador catalán, en pantallas LED. Á altura da boca destes cidadáns xorde auga en intervalos temporais regulares, polo que na primavera e no verán fórmase un pequeno estanque para o goce da cidadanía.
En palabras do propio escultor: “Unha fonte é a memoria da natureza, o marabilloso son dun pequeno río nas montañas trasladado a unha cidade. Para min, unha fonte no só significa un gran chorro de auga. Significa humidade, a orixe da vida”.
O magna obra foi construída coa colaboración dos arquitectos Ronal Krueck e Mark Sexton (Krueck & Sexton Architects) que trataron de converter en realidade as ideas de Plensa. A fonte, ou fontes, está realizada con 22.000 bloques de vidro, realizados en Pensilvania. Estas pezas tiñan que ser da cor da “auga branca” para que non modificaran as cores a proxectar ou a producir na pantalla LED. Ademais deberían ser moi finas, só dúas pulgadas de espesor, para evitar a distorsión das imaxes. Cada un destes vidros está colocado sobre unha cuadrícula de aceiro inoxidable agochada pero que facilita o cambio de calquera vidro que se poida estropear.
Cada pantalla LED é de 24 pes de ancho por 50 de altura, composta por 294 paneis conectados. En cada unha das pantallas prodúcense máis de 4,4 trillóns de cores. Algo que chama poderosamente a atención é que estas pantallas son enfriadas con ventiladores do garaxe situado debaixo do parque. As imaxes proxectadas proceden dun bucle aleatorio e continuo entre os cidadáns de Chicago fotografados por Plensa.
Todas as persoas participantes na iniciativa (alcalde Richard M. Daley), o deseño (Plensa), financiación (Familia Crown) e construción (Krueck & Sexton) da obra teñen manifestado a súa satisfacción polo uso que a cidadanía de Chicago está a facer da fonte tal e como se pode apreciar no libro de Russ.
Bibliografía Cesar Russ. The Crown Fountain. Millennium Park. Chicago. 2009, Realviews.
Post dedicado a Marta V., quen gozou tanto da arte de Chicago coma nós porque como di o fotógrafo madrileño César Russ, esta cidade “sempre te da máis do que podes imaxinar”.
Entradas
