En Punta Nariga (Barizo, Malpìca) construiuse en 1995 este faro deseñado por César Portal con 50 metros
de altura e 22 millas de alcance lumínico. Na web do arquitecto pódese ler o
seguinte.
"No extremo oriental de Punta
Nariga, en plena Costa da Morte, sobre un agreste cantil golpeado polo
mar e por incesantes temporais, construíuse este faro de 50 metros de altura de
plano focal e 22 millas de alcance
luminoso. Neste contexto de indómita natureza,
un faro, coa súa presenza, introduce un novo factor dialéctico: o artificial. A
secuencia cabo-faro-mar é paradigmática
e mutante coas distintas épocas do ano e
as horas do día.
Con tempo calmo e despexado, a quietude da contorna serena a
imaxe e acrecenta o estatismo do faro;
en días tormentosos, os cambios de luz e
o movemento das nubes transmiten ao conxunto un constante dinamismo. De día, a
solitaria silueta parece dormitar de pé,
mentres que á tardiña de súpeto cobra vida e comeza a facer chiscadelas e a
emitir escintileos e refachos de luz que
rasgan as tebras e penétranse no mar.
O conxunto edificatorio estrutúrase en catro corpos ben
definidos. O primeiro constitúeo unha plataforma de acceso público, a modo
de basamento de planta triangular. O
segundo corpo, de forma prismática e
base tamén triangular, inscrita na anterior, alberga os cuartos de instalacións
e de almacén, na primeira planta, e as dependencias do farero, na planta superior. A cuberta plana
convértese nunha plataforma-miradoiro elevada sete metros sobre a anterior. O
terceiro corpo constitúeo o fuste, un volume
cilíndrico de planta circular de 5,50
m de diámetro exterior e 25 m de
altura. O cuarto, situado no máis alto coroando o conxunto, confórmao a
lanterna. A relación e o contraste funcional e formal destes catro elementos,
de xeometría ben definida, e deles co terreo en que se asintan e o mar que os
rodea, constitúen a esencia do proxecto."
A construción do faro lembra á proa dun barco, coroada por
unha escultura de bronce denominada Atlante. Esta estatua, obra do artista Manolo Coia, é unha figura con forma entre un humano
e unha gaivota a piques de voar. Sen dúbida, unha silueta perfecta para as
marabillosas postas de sol de Nariga.
Para acabar a visita, podes subir ata a cuberta do faro, que se converte nun
perfecto miradoiro ao Atlántico.
FOTOS: INICIARTE
Entradas
.jpg)
No hay comentarios:
Publicar un comentario