Castro de Troña: agresión e multa ridícula

Un total de 2.000 euros é a cantidade que terá que pagar Augas de Mondariz por unha agresión ao patrimonio cultural de Galiza ao realizar obras no contorno do Castro de Troña, en Ponteareas. Así o vén de resolver a Consellaría de Cultura, segundo denuncia a organización ecoloxista Adenco.

A Xunta vén de multar con 2.000 euros a empresa Augas de Mondariz tras realizar obras nas proximidades do Castro de Troña, en Ponteareas, catalogado Ben de Interese Cultural (BIC) polo Executivo galego. A declaración BIC confírelle ao castro o nivel de protección máis elevado que recolle a lexislación vixente en materia patrimonial.

Segundo afirma a Consellaría de Cultura no expediente sancionador, as obras consistiron en “movementos de terra” que modificaron “a pendente orixinal do terreo”. Segundo a Xunta, a empresa abriu “unha pista de tres metros de anchura” e creou “varios bancais, algúns deles a un metro de distancia do camiño dos romeiros ao santuario do Doce Nome de Xesús”.

Estas obras, datadas de xuño do 2008, sitúanse segundo o expediente a menos de 200 metros de distancia do castro de Troña. Por outra banda dentro dos 200 metros de protección do castro tamén se a talar arborado, asegura Adenco. Os ecoloxistas denunciaron entón os feitos perante a Dirección Xeral de Patrimonio, a Policía autonómica e paralelamente nos medios de comunicación.

Sen licenza

A organización ecoloxista sinala que a propia empresa promotora Aguas de Mondariz “recoñeceu que non contaba nin coa licencia do concello de Ponteareas nin coa preceptiva autorización da Dirección Xeral de Patrimonio da Xunta, aínda que alegou que “descoñecía eses requisitos”.

Adenco subliña a “alteración irreversíbel” do xacemento e denuncia o “abandono absoluto ao que o concello de Ponteareas ten condenada desde hai moitos anos a súa xoia patrimonial coñecida en todo o país”.

"Multa insuficiente"

Para os ecoloxistas, a contía da multa é “ridícula”. “A importancia do castro de Troña require un celo estremo na salvagarda dun elemento patrimonial de primeira orde, mais a mensaxe que se está enviando resulta ben clara, atentar contra o patrimonio cultural de Galiza resulta pouco menos que gratuíto”.

Adenco ve contraditorio que apenas hai unhas semanas a propia Consellaría de Cultura “faga pública a intención de declarar Ben de Interese Cultural (BIC) o Castro de Troña e agora, nunha ocasión na que se pode actuar con contundencia advertindo de posíbeis agresións futuras, se resolve cunha sanción ridícula”.

Os ecoloxistas apuntan como un dos culpábeis o Concello de Ponteareas. “Ao non contar coa licencia municipal para as remocións de terras o Concello debería tamén ter iniciado un expediente sancionador por tal feito. Porén, non se fixo absolutamente nada”. Segundo advirten, catorce meses despois, a situación do xacemento é a mesma, “o máis absoluto desleixo e abandono”. “Nin se volveu limpar o mato, os accesos están cada vez máis deteriorados, nin hai a máis mínima promoción por parte da Concellaría de Cultura do concello”, engade Adenco.

Texto e foto vía A Nosa Terra.