As termas romanas de Campo Valdés en Xixón

Hai algún tempo conseguín achegarme ata Xixón para coñecer estas termas. A wikipedia cóntanos o seguinte:

As termas romanas de Campo Valdés eran uns baños públicos de época romana situados no actual Campo Valdés, no barrio de  Cimadevilla, na localidade asturiana de Xixón. Foi declarado Ben de Interese Cultural o 8 de maio de 1987.

  

  

Historia

As ruínas que perduraron poden visitarse e forman parte do xacemento arqueolóxico de  Cimadevilla xunto con outros restos da mesma era como a muralla da cidade. O edificio das termas comezou a edificarse no século I e estaba dividido en diferentes ambientes: unha zona fría, unha tépeda, e unha cálida con piscina quentada mediante un sistema de calefacción subterráneo. As paredes dalgunhas estancias estaban decoradas con frescos. No século II iníciase unha reforma e ampliación como testemuñan diversos restos.

Descubrimento e escavacións

As termas de Campo Valdés foron descubertas accidentalmente tras unhas obras de rede de sumidoiros realizadas en 1903. Calixto  Alvargonzález e Julio Somoza encargáronse dos primeiros labores de escavación e documentación, elaborando cos resultados un informe que foi arquivado polo Concello de Xixón.

O interese polos restos romanos non volveu aflorar ata o fin da Guerra Civil, cando se destruíu a antiga igrexa de San Pedro, edificada sobre as ruínas. É entón cando se discutiu se volver levantar o templo no seu emprazamento orixinal, idea que finalmente levou a cabo ocultándose unha parte do xacemento para sempre. Tras unha serie de intentos de expoñer parte das ruínas ao público, as escavacións iniciáronse en 1990 e sacaron á luz unha gran parte da construción, construíndose despois o actual museo, que foi inaugurado en 1995.

Pola súa banda os museos de Xixón infórmannos de:

A visita aos restos do edificio termal está precedida por varias unidades informativas que explican o significado das termas no mundo romano, as súas funcións, as tipoloxías, a distribución espacial e as actividades propias de cada habitación. Ademais da información xeral sobre as termas, fálase do desenvolvemento do Xixón romano, a muralla, as termas de Xixón e a súa interpretación. Os restos materiais máis significativos achados durante as escavacións, expóñense nunha vitrina corrida no corredor que dá paso ao xacemento.

O visitante introdúcese na ruína a través dunha pasarela que reproduce o percorrido orixinal. Cada espazo preséntase cunha reconstrución  infográfica do interior. Así mesmo, mediante luces de cores téntase evocar as zonas frías, as zonas de baños tépedos, os espazos quentes, os fornos, explicando así o sistema de calefacción romano.