XXV Certame de Pintura "Concello de Cambre"

Fiel á súa cita anual, o pasado venres 28 de novembro foi inaugurada a exposición correspondente á XXV edición do Certame de Pintura Concello de Cambre. É un certame de recoñecido prestixio a nivel galego (o máis importante dos que organizan os concellos de menos de cincuenta mil habitantes como lembrou o alcalde Antonio Varela) e español. Cada ano, cinco personalidades de recoñecido prestixio no ámbito das artes (pintores, escultores, ilustradores, arquitectos…) e do académico (docentes universitarios) forman parte do xurado. Nesta edición, o xurado estivo composto, nin máis nin menos, que por:

Agustín Ibarrola Goicoechea, escultor e pintor (Bosque de Osma, Bosque encantado de Salamanca, pedras de Allariz)

Guillermo Pérez Villalta, arquitecto, pintor (neomanierista entre a relixiosidade e a mitoloxía)

Roberto González, pintor (INICIARTE xa ten escrito do seu realismo conceptual)

Concha Jerez, artista interMedia e profesora universitaria en Salamanca.

Pepa Cerviño Lago, profesora universitaria na Coruña.

En edicións anteriores calquera artista español de recoñecido prestixio no que se pense foi tamén xurado. Como se salientou na inauguración, ningunha persoa do xurado cobrou por participar nas deliberacións, circunstancia que fai único este Certame de entre os que reparten premios parecidos.

A calidade das case trescentas obras presentadas foi salientada polo secretario do xurado, Xosé Cobas, auténtico protagonista, moi ao seu pesar, do emocionante e emocionado acto da inauguración, pois confirmou que despois de 25 anos organizando o Certame este ofoi o seu último traballo e que cómpre iniciar unha nova xeira na organización do concurso. Sen dúbida, Xosé Cobas, ilustrador bo onde os haxa (admirade o seu último traballo O libro das viaxes imaxinarias xunto ao seu amigo Xavier P. Docampo), ten ben merecido un descanso e tamén, sen dúbida, ten merecido unha homenaxe pública.

Os premiados foron:

Premio Extraordinario, dotado con 10.000 euros.
Ana María Sánchez González (Madrid): Augas do mundo.

1º Premio
Lola Berenguer Suárez (El Ejido, Almería): Once del doce.

2º Premio
Jorge Juan Vázquez Carmona (A Coruña): Trama Pi.

Accésit: José Manuel Vela Caballero (pozuelo de Alarcón, Madrid): Pintor con cerdo.
Mónica Santos Godoy (A Coruña): Sentido.

O catálogo, como sempre, foi magnificamente editado pola Deputación da Coruña.