Pintura renacentista italiana: unha introdución e uns vídeos

A ausencia de referentes clásicos na pintura do renacemento fixo que o modelo de onde partir fora Giotto, tratando de profundar no seu naturalismo e buscando ser o máis realista posible polo que estes artistas tiveron que facer estudos (estudos científicos) sobre as leis da óptica e tratar de establecer a perspectiva xeométrica construíndo pirámides visuais.

A pintura do renacemento italiano, que ten as súas raíces na arte de Giotto, aportará importantes novidades técnicas (introdución progresiva do óleo) en soportes (vaise esquecendo o retablo) e temáticas (continúa a relixiosa pero introdúcese o retrato e a mitoloxía clásica, as batallas, ademais da presenza da paisaxe, a aparición dos espidos como manifestación da beleza e sempre destacando a presenza humana) Nas composicións haberá que salientar o interese polo volume das formas, polo senso espacial e pola perspectiva. Tamén o debuxo será un elemento determinante con contornos nítidos que mesmo fará que ás veces as formas semellen planas. A luz vaise manexando cada vez con máis dominio e que progresivamente facilitará a captación da profundidade espacial. O gusto pola paisaxe, non obstante, non levará ao detallismo da pintura flamenga.

Buscarase a proporción, o equilibrio e a beleza plástica. Ademais o uso do óleo permitirá acadar un realismo e unha minuciosidade nunca conseguidos ata entón en Italia.

A partir do século XVI a cor manéxase dun xeito máis solto e perde a importancia o debuxo e o contorno. As formas adquiren máis verosimilitude, menos planas grazas ao claroscuros de sombras e luces, e mesmo á aparición das sombras que practicamente non existían no século anterior. As obras gañan en profundidade ao tempo que se deixa a obsesión polos estudos de perspectiva. Tamén a paisaxe gaña en riqueza ao deixarse de representar en exclusiva a natureza en primavera e xurdir as rocas, as néboas ou os luscofuscos. E nas composicións, xorden as relacións entre os personaxes pintados a través das miradas ou dos xestos.

A continuación poderedes ver uns vídeos de obras de pintores como Botticelli, Piero della Francesca, Rafael, Miguel Anxo, Tiziano ou Tintoretto.