O Barroco Español: as imaxes

Aqui tedes as imaxes do Barroco Español, tras unha breve introducción.

ARQUITECTURA: Evolución distinta á europea. Os modelos herrerianos, a severidade escurialense que tan ben servía aos ideais da Contrarreforma pola súa sobria austeridade e a súa simplicidade xeométrica, van pervivir longamente. A partir de mediados do XVII os elementos decorativos, de influencia italiana, van irse impoñendo á austeridade herreriana. Este estilo máis decorativo, rico e, mesmo fantástico, vaise prolongar ata a primeira metade do XVIII.

ESCULTURA: Evolución distinta á europea. Fronte á escultura barroca de Italia e Francia de orixe berniniana, en mármore e bronce con amplo uso da mitoloxía e da alegoría, en España cultívase a escultura en madeira policromada de carácter exclusivamente relixioso, que se pon por enteiro ao servizo da piadosa sensibilidade contrarreformista, que procura aproximar a realidade do feito relixioso representado para mover a sensibilidade do crente, quen asiste, así, en certo modo, ao feito (ao “paso”) da Paixón de Cristo, ou sinte aos santos como persoas vivas e reais, próximas enteiramente á súa realidade cotiá.

PINTURA: O século XVII é o chamado Século de Ouro da pintura española. Xorden algunhas das figuras máis sobranceiras da pintura mundial a pesar da limitación que supuña a carencia case total da pintura profana, especialmente da mitolóxica, xa que os clientes principais (corte e Igrexa) estarán cheos de relixiosidade. Só Velázquez gozará da liberdade temática. Na primeira metade do século as formas predominantes son as do naturalismo tenebrista, de clara influencia italiana. Na segunda metade, a difusión de modelos flamenco rubenianos, e o novo sentido, máis triunfal, opulento e colorista, que a Igrexa difunde, muda por completo o ton da pintura española que de realista e tenebrista pasa ao colorismo luminoso e ao optimismo teatral do pleno barroco.

| View | Upload your own