Protección para o campamento romano de Aquis Querquennis

Nova de hoxe de La Voz de Galicia:

"O campamento romano de Bande será illado do encoro das Conchas
Autor: Jesús Manuel García

A Fundación Aquae Querquennae-Via Nova ten a intención de illar aos poucos o campamento romano de Bande das augas do encoro das Conchas. O recinto militar de Aquis Querquennis é un dos máis grandes que a Roma imperial deixou na península Ibérica. A día de hoxe, se é grande a superficie escavada, máis grande é toda a que segue baixo terra.

Na reunión que a fundación celebrou onte xunto a este importante complexo arqueolóxico ourensán decidiuse que para o ano entrante hai que seguir escavando a zona da muralla perimetral para logo sacala á luz e recompor o que sexa posible, di Antonio Rodríguez Colmenero, co obxectivo de que a propia cerca impida o paso da auga do encoro e deixe de danar a zona escavada. «Isto non se pode facer nun só ano, pero iremos traballando aos poucos con este obxectivo», dixo Colmenero. Durante unha boa parte do ano non é posible visitar o soado campamento militar romano debido a que o cobre o encoro. Hai fotos aéreas que deixan ver as estruturas murarias dos edificios coma se tivesen encima unha placa de cristal.

Coa idea aprobada onte trátase de permitir as visitas durante máis meses do ano. Esta iniciativa englóbase nunha nova fase, a cuarta, do proxecto europeo Geira, de cuxa aprobación están á espera. Se algún día íllase este xacemento, Colmenero sinala que quedarían permanente á vista uns 25.000 metros cadrados.

Desas 2,5 hectáreas, está escavado o ángulo noroccidental. O campamento construíuse nesta zona da Baixa Limia para construír a Vía Nova, que por alí entra en Ourense procedente de Braga e rumbo a Astorga. Nesa praza militar asentábase a Cohors III Quinquenaria Equitata , pertencente á Legio VII Gémina ou, o que é o mesmo, unha unidade de 608 soldados dos que 480 eran de infantería, e o resto, de cabalería.

O arqueólogo Santiago Ferrer Sierra sinala que o campamento se acha no centro do antigo Convento Bracarense, na milla 53, contando desde Braga. Engade que a súa localización alí puido deberse á influencia das augas termais, pero o campamento está na metade dese tramo viario. Alí había enxeñeiros que se encargaban dos proxectos, e os obreiros, que se dedicaban a traballar. Este xacemento data de entre finais do século I e mediados do século II logo de Cristo."

Fotos: INICIARTE.