Pazo de Meirás (I): devolución xa!!!

Iniciarte non ten como obxectivo prioritario loitar polo respecto ao patrimonio (material ou inmaterial) pero hai un tema que me afecta ata as entrañas.... o Pazo de Meirás.

Por fin onte produciuse unha desas novas que lle alegran a un o día (ver a noticia en La Voz de Galicia): o Tribunal Superior de Xustiza de Galicia obriga á familia Franco a tolerar a inspección de técnicos de patrimonio (que bo traballo está a realizar nesa Dirección Xeral o admirado Felipe Arias) no pazo. É o primeiro paso para declaralo Ben de Interese Cultural.

Non vos contarei toda a historia desta construción decimonónica (podedes vela no blog Sada digital), tal só lembrar que a proposta da “Junta local de iniciativas de La Coruña" (para que dicirvos por quen estaba composta) recadáronse, manu militari, 400.000 pesetas para adquirir o pazo (as leiras colindantes foron expropiadas).

Creo que fun o primeiro, hai xa moitos anos, en publicar (Fontes para o estudo da cidade. A Coruña do franquismo á democracia) o texto íntegro do pergameo polo que se lle facía entrega ao ditador do pazo en 1938. Un texto que remataba dicindo:

“Galicia que le vio nacer, que oyó su voz el dieciocho de Julio, que le ofreció la sangre de sus hijos y el tesoro de sus entrañas, que le siguió por el camino del triunfo en la unidad, grandeza y libertad dela Patria, asocia en esta fecha, para siempre, el nombre de Franco a su solar, en tierras del Señor San Yago, como una gloria más que añadir a su historia “

Podedes ver este video de Antena 3, do seu programa 360 grados no que se repasa a doazón do pazo e as propiedades dos Franco.

Tamén vos deixo outro documento sobre as propiedades da familia Franco. Lamento non poder citar a fonte de procedencia.

Hoxe comeza o camiño para a recuperación do patrimonio en Sada.