Megálito "Altar do Sol" (Lalín, Pontevedra)

 

Na Comarca do Deza, e no luar de Alperiz (Santa María de Parada, Lalín) atópase este megálito neolítico que coñecín grazas ao bo labor como guía turístca de Esther G., do grupo "Os sabios do Afonso".

Patrimonio galego afirma o seguinte:

Segundo o catálogo arqueolóxico do concello de Lalín do ano 1999, este dolmen estaría formando parte da zona coñecida como “As Mámos da Cruz ” do Conxunto Megalítico de Alperiz. Está a 42 metros ao norte da mámoa numerada como número 7 (Mámoa do Cruce, chamado así por estar a carón do cruce da estrada de Alperiz, e con gravados serpentiformes).

Este recinto pechado está presidida por unha gran pedra con dous rebaixes en forma de círculo, os veciños coñéceno co nome de Altar do Sol. Segundo información de M.J. Meijome a pedra principal foi gravada en tempos modernos cunha cuadrícula.

No rexisro oficial da consellería de Cultura consta como BIC o Gravado Rupestre de Alperiz “Monte Fonteiriño, Altar Do Sol” catalogado como monumento histórico-artístico -segundo o asento oficial o 20 de decembro de 1974, e como “zona arqueolóxica” aparece a Mámoa da Cruz, recoñecida por Cultura máis recentemente; en concreto en marzo de 2011. 

É unha das tres que quedan do grupo de Mámoas da Cruz, había sete orixinariamente. En setembro de 2015 procedeusa a limpeza do lugar e a unha intervención arqueolóxica. 

Fotos: INICIARTE.