Visitando exposicións: O esplendor do Románico

Hai uns días puiden visitar a exposición O esplendor do Románico na Fundación Mapfre, en Madrid. Na sala de Recoletos amósanse unha selección de obras do Museo Nacional de Arte de Cataluña, aproveitando as obras de remodelación das sala do románico do museo barcelonés. A verdade é que a exposición é magnífica cunha esmeradísima posta en escena. Artéllase en torno a cinco eixos temáticos: a cor da arquitectura, un espazo para a narración, a escultura románica, o poder das imaxes e o tesouro da igrexa.

Dentro da montaxe destaca unha recreación en 3D da portada do Mosteiro de Ripoll. Ademais a exposición compleméntase cunha extraordinaria información na web: seccións, visita virtual, folleto ou selección de imaxes. Unha visita imprescindible.