As pinturas de Altamira

Sempre que pensamos na arte da prehistoria a primeira imaxe que non vén á cabeza son os bisontes de Cova de Altamira (Santillana del Mar, Cantabria). De feito a súa importancia é tal que xunto coa cova francesa de Lascaux, están consideradas como a “Capela Sixtina da Arte Cuaternaria”.

A anécdota do descubrimento da cova está mil veces reproducida, mais a nós tan só nos interesa saber que foron descubertas casualmente en 1868 e que cando foi comunicado o seu achádego pensouse que eran un fraude polo seu excelente grao de conservación.

As pinturas teñen entre os 12.000 e os 14.000 anos de antigüidade, sendo, xa que logo, do Magdaleniense. A cova ten uns 270 metros de lonxitude, tería unha entrada, antes do derrubamento que a pechou, de vinte metros de longo por uns seis de ancho e unha gran sala duns douscentos metros cadrados que sería o lugar de habitación. No seu interior atópase unha gran sala decorada por pinturas de cores ocres, marróns, amarelos e negros nas que son representados bisontes ademais de cabalos, cervos porcos bravos, mamuts e renos así como algunhas figuras antropomorfas e diversos símbolos. Ás veces estas figuras conforman conxuntos e outras parecen de forma illada aproveitando as protuberancias das paredes.

Sobre as intencións dos artistas que as fixeron, moito se ten dito: que se formaba parte dun santuario relixioso, que se eran a representación simbólica dunha guerra entre clans, que se eran ritos de fertilidade, que se estaban realizadas para favorecer a caza posterior ou que “simplemente” eran outro exemplo máis da arte pola arte.

Hoxendía as pinturas non son visitables por problemas de conservación (unha maldade: eu as puiden visitar en dúas ocasións e non vou dicir como) mais contamos coa posibilidade de achegarnos ata algunhas das dúas réplicas feitas: unha na Neocova do Museo de Altamira (Santilla del Mar) e outra no Museo Arqueológico Nacional de Madrid (canto deixará de estar no abandono este magnífico museo?).

Non deixedes de visitar as entradas de arte prehistóricas de Enseñ-arte.