14/5/18

Marina City. Chicago


Marina City
Rúa State, Chicago, Illinois, Estados Unidos de América.
Arquitecto: Bertrand Goldberg,  1964.

    Unha das obras que máis me chamaron a atención cando visitei Chicago foi este conxunto de torres.

Marina  City é un complexo de edificios de uso mixto (residencial e aparcadoiro) que ocupa toda unha mazá da Rúa  State en Chicago,  Illinois, Estados Unidos. Está situado na beira norte do Río Chicago no centro de Chicago, xusto enfronte do  Loop. O complexo componse de dúas torres de 65 plantas e 179  metros de altura con forma de  mazorca de millo. Tamén contén un auditorio con forma de cadeira de montar e un hotel de media altura, todos sobre unha plataforma elevada á beira do Río Chicago. Debaixo da plataforma, ao nivel do río, hai un pequeno porto deportivo para embarcacións de recreo, que dá nome ao complexo. Marina  City foi o primeiro edificio de Estados Unidos construído con guindastres torre.

Marina City foi construída por unha empresa conxunta de  Brighton  Construction  Company, propiedade de Thomas  J.  Bowler, e James  McHugh  Construction  Company. James  McHugh  Construction  Co. construiría posteriormente  Water  Tower  Place en 1976 e  Trump  International Hotel  and  Tower en 2009.

Marina City foi deseñada en 1959 polo arquitecto  Bertrand  Goldberg e completouse en 1964 cun custo de 36 millóns de dólares, financiados en gran medida pola unión de conserxes e  ascensoristas. Cando se completaron, as dúas torres eran os edificios residenciais máis altos do mundo e as estruturas de formigón armado máis altas do mundo. O complexo construíuse como unha “cidade dentro dunha cidade”, con numerosas instalacións como un teatro, ximnasio, piscina, pista de patinaxe sobre xeo, boleira, tendas e restaurantes, e, por suposto, un porto deportivo.

Marina  City foi o primeiro complexo de rañaceos residenciais da posguerra dos Estados Unidos e é recoñecido amplamente por comezar o renacemento residencial dos centros das cidades norteamericanas. O seu esquema de uso mixto residencial e oficinas e rañaceos con aparcadoiros nas primeiras plantas converteuse nun modelo de desenvolvemento urbano.

Arquitectura
As dúas torres teñen plantas idénticas. As dezanove plantas máis baixas forman un aparcadoiro espiral ao aire, que ten 896 prazas en cada edificio. O andar vinte de cada torre contén unha lavandería con vistas do Loop (zona centro de Chicago), mentres que as plantas 21 á 60 conteñen apartamentos (450 en cada torre). Na última planta, a 61, hai unha azotea ao aire libre. Accédese aos edificios por vestíbulos separados que comparten unha entreplanta baixa o terreo así como entradas pola praza, xunto á " House  of  Blues". Orixinalmente eran apartamentos de aluguer, pero en 1977 o complexo converteuse nunha comunidade de propietarios.



Os apartamentos de Marina City son únicos porque non conteñen case ningún ángulo recto no interior. En cada planta residencial, un corredor circular rodea o núcleo de ascensores, que ten 10 metros de diámetro, con 16 cuñas dispostas ao redor do corredor. Os apartamentos compóñense destas cuñas triangulares. Os baños e as cociñas sitúanse máis preto do vértice de cada cuña, cara ao interior do edificio. As zonas de estar ocupan as zonas máis exteriores de cada cuña. Cada cuña termina cun balcón  semicircular de 16,3  m2, separado das zonas de estar cunha ventá do chan ao teito. Debido a esta disposición, cada salón e dormitorio en Marina City ten un balcón.

As torres foron premiadas pola Sección de Nova York do  American  Institute  of  Architects en 1965 pola súa innovación.

Estas torres foron reiteradamente utilizadas pola cultura popular actual. Así a famosa banda de Chicago (gran concerto no 2016 no Palacio da Ópera da Coruña)  Wilco as puxo na portada do seu disco de 2002  Yankee Hotel  Foxtrot, polo que  en ocasións fixo que se chame a Mariña  City como " Wilco  Towers". Ademais aparecen nas portadas de numerosas gravacións de bandas musicais, vídeos  clips, anuncios, películas ou videoxogos.

Texto adaptado da Wikipedia.

Fotos actuais de INICIARTE.

Déixovos unha selección de videos:


No hay comentarios: