5/8/08

Sete escenas berlinesas de Ernst Kirchner expóñense xuntas no MoMA de Nova York



Os sete cadros máis importantes da famosa serie de escenas rueiras berlinesas do pintor expresionista alemán Ernst Ludwig Kirchner (1880-1938) poderán verse xuntos por primeira vez no Museo de Arte Moderna (MoMA) de Nova York do 3 de agosto ao 10 de novembro.
A mostra ofrece unha profunda investigación sobre a serie de escenas rueiras de Berlín, realizadas entre 1913 e 1915, que constitúen o máximo expoñente do expresionismo alemán. As sete obras móstranse xuntas por primeira vez, e foron prestadas por coleccionistas públicos e privados de Alemaña, Suíza, Italia e Estados Unidos para verse unicamente no coñecido museo de arte moderna neoiorquino.

Co motivo pictórico pouco común da prostituta e unha linguaxe visual de formas recortadas e cores estridentes, o artista evoca as contradicións da vida nas cidades modernas, do glamour nocturno á decadencia e a soidade, dixeron os expertos da institución.

En 1905 Kirchner fundou con outros estudantes o grupo Die Brücke (A Ponte), que pretendía un estilo plano de cores puras inspirado na arte primitiva, con trazos máis naturais e espontáneos. Este grupo de expresionistas tivo bastante éxito en Alemaña, pero se disolveu en 1913, tras levar dous anos traballando en Berlín. O mesmo ano, na soidade e desánimo que sentiu Kirchner ante a separación do grupo, comezou a pintar esas escenas, que reflicten tamén a tensión que se viviu na etapa inicial da Primeira Guerra Mundial e que están consideradas non só o punto cume da carreira do artista senón tamén un fito no expresionismo alemán.

Para contextualizar as obras, a exposición reúne tamén sesenta debuxos e impresos do artista, nos que se reflicte o seu modo de traballo, a evolución do seu proceso creativo e o seu interese pola figura feminina.





















Texto e fotos: vía La Voz de Galicia.

No hay comentarios: